Sa baylo nga special armor sang Armed Forces of the Philippines (AFP) ang uyatan, nagbitbit ang pila ka miyembro sang militar sang mga ulutanon kag iban pa nga lokal nga produkto halin sa lokal nga mangunguma agud ibutang sa mga community pantries sa syudad kag probinsya sang Iloilo.
Ini nga grupo ang naghalin sa AFP 6th Cavalry Company – Special Armor Division nga naka-base sa Jamindan, Capiz.
Sa interview sang Bombo Radyo kay Captain Rani V. Birog, pinuno sang Special Armor Division, iya ginpahayag nga sang nabatian nila ang inisyatibo sang community pantries sa pungsod, nagtipon man sila sang kwarta agud nga makabulig sa komunidad nga tuman ka apektado sang pandemya.
Ini nga kwarta ang ginbuhin halin sa subsistence allowance nga para kuntani sa pagkaon sang militar.
Boluntaryo nga nag-amot-amot ang ila nga mga miyembro.
Naglab-ot sa masobra P10,000 ang natipon sang mga miyembro sang Special Armor Division; kag ang kwarta ang ginbaylo sa local products kag amo ang ginturn-over sa pantries.
Kahapon, Abril 24, personal nga nagpadulong si Birog kag ang iya grupo sa La Paz, Iloilo City kag Pototan, Iloilo agud i-turn over sa community pantries ang ila nga donasyon.
