ILOILO CITY- Wala ginkumpormihan sang isa ka abugado ang pahayag ni anay Senate President Juan Ponce Enrile nga indi maprotektahan sang Estados Unidos ang Pilipinas kon mag-ibwal ang kinagamo batok sa China bangud sa agaway sa West Philippine Sea.
Sa interview sang Bombo Radyo kay Atty. Jonnie Dabuco, regional director sang Commission on Human Rights Region 6 kag law professor nga nagatudlo sang international law, iya ginpahayag nga kon basehan ang Mutual Defense Treaty sa tunga sang Pilipinas kag Estados Unidos, wala nasaad nga makabulig lang ang US kun sa Pasipiko matabo ang kinagamo kag indi sa iban nga teritoryo sang Pilipinas.
Ini kasunod sang pahayag ni Enrile nga indi sakop sang treaty area ang West Philippine Sea.
Suno kay Dabuco, masandigan sang Pilipinas ang amo nga treaty sa tion nga may provocation ukon aggression sa parties nga kinahanglan sang bulig sang US kaangay sang pagpadala sang military assistance kag iban pa.
Samtang, ginpahayag ni Dabuco nga apisar nga may ruling ang international criminal court nga nagapamatuod nga teritoryo sang Pilipinas ang West Philippine Sea, indi sa gihapon unanimous ang panindugan sang Association of South East Asian Nations (ASEAN).
Suno sa abugado, mangin ang Pilipinas nga amo ang concerned party ang nagapang-alang- alang man sa amo nga isyu kag sa iya panindugan gani indi man mabasol ang iban nga myembro sang ASEAN kon wala man sila sang gana nga apinan ang Pilipinas.
