ILOILO CITY – Nakasugod na sa pagbantay sa quarantine control points sa syudad sang Iloilo ang 200 ka mga police personnel nga gin-augment sang Police Regional Office VI sa Iloilo City Police Office (ICPO).
Ini ang may kaangtanan sa pagpatuman sang mga protocol sa idalom sang Modified Enhanced Community Quarantine — ang classification status sang syudad tubtob sa Mayo 31.
Ang qurarantine control points ukon ang identified nga entrance kag exit sang syudad ang yara sa Barangays Lanit, Tagbak, Bitoon, kag Ungka sa Jaro, Hibaoan sa Mandurriao, kag Mohon sa Arevalo.
Sa interview sang Bombo Radyo kay Police Captain Shella Mae Sangrines, spokesperson sang ICPO kag hepe sang Iloilo City Police Station 1, iya ginpahayag nga halin sa Regional Mobile Force Battalion ang 200 ka mga pulis.
Dugang ini nga pwersa sa pulis sang Iloilo City agud masigurado nga para lang sa essential purposes ang makasulod sa syudad kag wala sang nagalagaw-lagaw lang.
May yara man sang magagmay nga mga lulutsan sa mga barangay sa syudad nga sarang gihapon maagyan sang mga pasaway nga byahero apang na-tap naman sang ICPO ang bulig sang mga barangay officials agud mabantayan ini nga mga area.
