Nag-umpisa na ang Iloilo City Police Office (ICPO) sa imbestigasyon sa ginapahayag pagbaligya sang COVID-19 vaccination tickets sa syudad sang Iloilo.
Mismo si Iloilo City Mayor Jerry Treñas ang nagmandu sang imbestigasyon bangud indi luyag sang alkalde nga may mabiktima sang sini nga modus.
Sa interview sang Bombo Radyo kay Police Col. Uldarico Garbanzos, director sang ICPO, iya ginpahayag nga ginmanduan niya ang Iloilo City Police Station 1 nga magdeploy sang personnel malapit sa vaccination area agud nga maka-monitor.
Santo sa report, may yara sang lalaki nga nagatanyag nga siya na ang bahala para sa ticket sang mga luyag magpabakuna kabaylo sang P1,500 nga bayad.
Wala man nagsugot ang indibidwal nga iya gintanyagan. Apang sang gin-usisa sang pulis, indi na sini matandaan ang itsura sang lalaki nga nagtanyag nga ‘siya na ang bahala sa ticket’.
Gin-athag sang ICPO kag sang Iloilo City Government nga wala sang baligyaanay sang vaccines sa syudad bangud libre ini halin sa national government.
Una na nga nagpaandam ang alkalde nga pasakaan sang kaso-kriminal ang madakpan nga nagabaligya sang vaccination tickets.
