ILOILO CITY – Nagreklamo ang isa ka manunudlo nga taga-syudad sang Iloilo matapos ang ‘kapaltahan’ nga naeksperyensyahan sa sulod sang vaccination site sa University of San Agustin.
Hunyo 24 ang original nga schedule nga nakabutang sa ticket nanday Mr. Jude Fabular, manunudlo sa Iloilo Central Elementary School, apang wala sila naakomodar tanan bangud kulang na ang COVID-19 vaccines.
Sa interview sang Bombo Radyo kay Fabular, iya ginpahayag nga ginpabalik sila pagkasunod nga aga, Hunyo 25.
Suno kay Fabular, ginbalibaran man sila nga paunahon sa pila bangud Hunyo 24 pa ang petsa nga nakabutang sa ila ticket. Bangud indi na niya luyag magpagamo pa, nagpasugot si Fabular kag ang iya nga mga kaupod nga manunudlo nga maghulat pa gid liwat kag hulaton kun pwede na sila papilahon.
Sang nagpila na liwat ang mga manunudlo matapos ang kapin anum ka oras, ginbawi naman ang mga ticket bangud ginapahayag wala na sang bakuna.
“Gasunod man kami sang gusto nila nga matabo. Naghulat kami kag nagpila kami, kag anay kag naglinya kami, binawian nila kami sang ticket kag ang mga maestra nga upod ko?,” pahayag ni Fabular.
Sa 18 nga manunudlo nga nagpadulong sa vaccination site, apat lang ang nabakunahan suno kay Fabular bangud ‘may yara gid sang nagapasikat kag indi mag-cater’.
Ang ginalain pa gid sang buot sang natungdan amo ang iya nasaksihan sa sulod sang kapin anum ka oras nga paghulat niya sa vaccination site.
Suno sa manunudlo, may mga naga-abot nga wala man sang ticket kag may yara man nga wala man naka-pre register apang ginapauna pa sa doktor.
Ang iban suno sa natungdan may naga-edad pa sang 18 anyos ukon 20 anyos kag ginapahayag wala man sa A1-A4 priority group apang gin-una sang mga personnel.
“Kami nga frontliners, ginpasulod mo na, ginatagaan mo na papel, tapos bawian mo? Kumbaga sa isda, ara na sa baba ang bunit, tukbon na sang isda, gulpi mo lang ya binutong?”
Pagkatapos suno kay Fabular, nagpauli na ang mga manunudlo apang minutos lang ang nakaligad, nagtawag naman ang personnel kag ginpabalik sila bangud may available na nga bakuna.
Wala na nagbalik ang mga manunudlo suno kay Fabular bangud nakasakay na sa jeep kag nagbulagay na.
“I am an eyewitness and I am an earwitness sang nagakatabo sa vaccination site because I stayed there for almost six hours! Indi ni ginduhol sa akon ah, ako mismo ang nakakita kag nakabati,” pahayag pa ni Fabular.
Dugang pa niya: “We are professional. Nagsunod gid kami sang gusto ninyo. Indi lang kami pagpakahuy-i sa publiko kay ang gwa namon nahuy-an gid kami. Ginbawian kami sang papel nga ara na sa kamot namon. In front of hundreds of people, ang mga maestra ginbawian sang papel kay indi pwede magpa-vaccine? Tapos minutos lang, tawgan kami kay pwede na kami kapa-vaccine?”
SUNO SA ILOILO CITY GOVERNMENT
Maathag sa mandu ni Mayor Jerry Treñas nga wala ginapahanugutan sa vaccination site ang mga tawo nga wala sang official ticket.
Una na nga ginpahayag ni COVID-19 team spokesperson Mr. Jeck Conlu nga may mga empleyado nga gina-una akomodar bangud kritikal ang ila nga trabaho.
Pila sa mga may kritikal nga trabaho nga ginpahayag ni Conlu amo ang mga katapo sang Iloilo City Emergency Responders (ICER), Public Safety and Transportation Management Office (PSTMO) kag City Disaster Risk Reduction and Management Office (CDRRMO).
Bukas ang Bombo Radyo sa paathag sang Iloilo City Government.
