Mas pasangkaron pa sang compliance team sang Iloilo City Government ang pag-monitor sa mga namatyan sa 180 ka barangay sa syudad sang Iloilo agud mapat-od nga ginapatuman ang husto nga pagsulundan samtang naka-modified enhanced community quarantine (MECQ) status ang syudad.
Sa Executive Order 53 ni Iloilo City Mayor Jerry Trenas, ginapahanugutan ang haya sang patay sa kondisyon nga limitado lamang sa first-degree relatives ang makatinir sa balay kun sa diin nahamyang ang patay kag tatlo ka adlaw lamang ang maximum days sang paghaya.
Ini ang nalapas sang may nadakpan ang Criminal Investigation and Detection Group (CIDG) -Iloilo Field Office nga namatyan sa Barangay Ingore, Lapaz, Iloilo City kun sa diin kapin isa ka bulan na ang pagtinir sang patay kag may pasugal pa nga ginapatigayon ang mga pumuluyo.
Sa interview sang Bombo Radyo kay Mr. Nestor Canong, pinuno sang compliance team sang Iloilo City Government, iya ginpahayag nga nakahibalo na ang Liga ng mga Barangay sang amo nga kaso nga natabo sa Ingore, Lapaz.
Liwat man nga nagpahanumdom ang opisyal sa publiko nga mangin compliant sa EO sang alkalde.
