Gindayaw ni Iloilo Governor Arthur Defensor Jr. ang kaisog ni Iloilo City Mayor Jerry Treñas nga ipalab-ot sa national government kun ano kadaku nga bulig ang kinahanglanon sang Western Visayas bangud sa surge sang COVID-19 cases.
Sa nauna nga mga interview sang Bombo Radyo kay Treñas, wala hawid-hawid ang nangin statement sini kag ginlaslasan pa pati ang pila ka national government officials agud mabalikdan man ang sitwasyon indi lamang sa Iloilo City kundi pati na sa bilog nga rehiyon.
Pila diri amo ang pagpahayag ni Treñas nga ginauna pa ni Presidential Spokesperson Harry Roque ang iya baba sangsa iya utok kasunod sang pahayag sang presidential spokesperson nga may pagtaas sang kaso sa syudad sang Iloilo bangud sang kakulang sang compliance sang mga tawo sa COVID-19 protocol.
Si Treñas man ang ginapahayag nagtaas sang tingog kay Department of Health Secretary Francisco Duque III bangud sa isyu sa kakulangan sang medical personnel, medical equipment, kag bakuna sa Western Visayas.
Si Treñas ang nagdemanda sang pagpaathag halin sa DOH Region VI kun ngaa wala na-account sang husto ang ginaalegar 17,680 doses sang COVID-19 vaccines nga ginpahayag sang DOH nga nag-abot sa Iloilo City.
Wala man ginpalampuwas ni Treñas si DOH Undersecretary Maria Rosario Vergeire bangud wala ginsapak sang undersecretary ang ginapangayo ni Treñas nga paathag kun diin nagkadto ang masobra 17,000 doses sang bakuna.
Sa interview sang Bombo Radyo kay Governor Defensor, iya ginpahayag nga ginaapresyar gid niya ang pagpanguna sang alkalde kag ang agresibo nga inisyatibo agud mahibal-an sang national government nga kritikal ang pagkinahanglan sang Western Visayas.
Ang Iloilo City ang nauna nga gin-anunsyar ni Roque nga nadala sa napulo ka syudad halin sa Visayas kag Mindano nga unahon sa COVID-19 vaccination program.
Ang bilog nga Western Visayas naman ang nadala sa gin-tag sang DOH nga high-risk sa COVID-19 case trend. Ini ang base sa data sang Epidemiology Bureau sang DOH nga ginpresentar sang online media forum sang damlag lang. Kaupod sang Western Visayas ang Caraga, Davao Region, kag Soccsksargen.
“I really appreciate Mayor Treñas for taking the lead. Ginadala ya ang marka sang Region VI para nga kapangayo kita didto sa national government and we can have an aggressive initiave in letting the national government know that we are also in need like nine other regions nga pareho man sa aton diri sa Region VI. We are being treated now as one of the provinces that are in critical condition,” pahayag ni Defensor.
Sa bahin sang Iloilo Provincial Government suno kay Defensor, padayon man ang pagpakig-istorya sini kay vaccine czar Sec. Carlito Galvez Jr. para sa vaccine deployment.
