Ginpaidalom sa surgical lockdown ang 102 ka mga balay sa Malangabang, isa ka island barangay sa Concepcion, Iloilo.
Ini matapos 89 ka mga pumuluyo sa amo nga barangay ang pinakaulihi nga ginpaidalom sa swab test.
Sa interview sang Bombo Radyo kay Concepcion Mayor Dr. Raul Banias, iya ginpahayag nga sa 21 new COVID-19 cases sa Concepcion, 14 gid ang halin sa Malangabang Island.
Ang nabilin nga new cases amo ang:
- 3 cases sa Sitio Sumpa, Poblacion, Concepcion
- 2 cases sa Palm Concepcion Power Corporation (mga Janitorial personnel)
- 1 case sa NHA Bacjawan Sur
- 1 case nga Authorized Person Outside Residence
Suno kay Banias, hugot ang pagbantay sang mga pulis sa lugar nga naka-surgical lockdown agud mapat-od nga nagasunod ang mga tawo sa mga protocol.
Magluwas sa 89 nga close contact sa Malangabang, may walo pa gid sa Rural Health Unit ang ginpaidalom man sa COVID-19 test kag pito sa sini nga numero ang may travel history sa amo nga isla.
Gin-ako ni Banias nga kun madugangan pa gid ini nga mga kaso subong nga adlaw, indi na ini masarangan sang quarantine facility bangud okupado na ang 60-unit nga facility bangud masobra 90 subong ang gina-isolate.
