Nagapanindugan si San Enrique, Iloilo Mayor Trixie Fernandez nga nakapakig-angot ang local government unit (LGU) sa health authorities sang natabo ang pagkaguba sang 167 ka vaccine doses nga yara sa cold storage facility sang banwa.
Sa interview sang Bombo Radyo kay Fernandez, iya ginpahayag nga gamiton kuntani sa second dose ang 167 nga Sinovac vaccines.
May natabo nga 10 tubtob 15 ka minutos nga brownout suno sa alkalde apang wala sang advisory nga napapanaug ang electric company antes ang power interruption.
Sa kinaandaan, may ginahanda man nga generator set ang LGU agud nga mapabilin ang required temperature sa anum ka mga refrigerators sa banwa.
Suno kay Fernandez, bangud nagbalik man gilayon ang kuryente, wala na gingamit ang generator set.
Ulihi na sang natalupangdan nga may isa ka refrigerator nga wala nag-automatic sa pag-power on.
Sang gin-check sang Municipal Health Office (MHO) suno kay Fernandez, naglab-ot na sa 10 degrees Celsius ang fridge temperature.
Ang bakuna sang Sinovac ang dapat nga taguon sa normal fridge temperatures nga 2 to 8 degrees Celsius agud nga indi mapan-os.
Bangud sang natabo suno sa alkalde, santo sa abiso sang Department of Health Region VI, wala na lang gingamit ang bakuna bangud posible nga nagnubo na ang potency sini ukon may lain na nga epekto sa lawas sang tawo.
Nagpaathag man si Fernandez nga ‘beyond control’ ang natabo kag wala hungod nga ginguba.
