ILOILO CITY – Nagapati ang Iloilo City Police Office (ICPO) nga may nagasulsol sa pamilya Bolante agud ipahayag nga nagabutig ang mga pulis kaangot sa drug buy bust operation sang Hunyo 29 sa North Baluarte, Molo, Iloilo City.
Sa amo nga operasyon, patay ang 27 anyos nga si Karl Dannielle Bolante bangud natiruhan sang pulis bangud ginapahayag nga kaupod ini sang subject kag naghana pa nga maghaboy sang granada.
Ginpuno sang kontrobersiya ang amo nga kaso bangud nanindugan ang pamilya nga nasalabat lang si Karl Dannielle kag wala gani ini sang labot sa matuod nga subject.
Sang nag-gwa ang autopsy result kun sa diin ginpakita nga ang cause of death ni Karl Dannielle amo ang igu sang bala sa likod kag sang naggwa man nga negatibo ini sa parrafin test, may dugang pa gid nga mga pahayag ang pamilya.
Suno sa iloy nga si Amalia Bolante, nagapati siya nga ginpaako lang kay Police Corporal Rodante Lopez, operatiba sang Iloilo City Police Station 1-Station Drug Enforcement Team, ang pagluthang-patay kay Karl Dannielle.
Sa interview sang Bombo Radyo kay ICPO Director Police Colonel Uldarico Garbanzos, iya ginpahayag nga ‘speculative’ ang pahayag sang pamilya kag ‘may nagatudlo’ sa ila.
Nanindugan si Garbanzos nga ginsunod gid ang husto nga police operational procedure.
Hulaton lang suno sa iya ang resulta sang motu-proprio investigation nga ginapatigayon sang Philippine National Police (PNP) – Regional Internal Affairs Service (RIAS) VI.
Samtang, nakapasa naman sang counter-affidavit sa RIAS 6 ang pulis nga si Lopez kag si Police Captain Shella Mae Sangrines, hepe sang Iloilo City Police Station 1.
Sa interview sang Bombo Radyo kay Pol. Col. Roger James Brillantes, director sang RIAS 6, iya ginpahayag nga ginpanginwala sang duha ang administrative charges nga grave irregularity in the performance of duty kag irregularity in the performance of duty base sa doctrine of command responsibility.
Suno kay Brillantes, may 10 ka adlaw ang RIAS 6 agud magpatigayon sang pre-charge investigation.
Kun magtakop na ang 10 ka adlaw, magahatag sila sang rekomendasyon para sa summary hearing kun may makit-an nga probable cause sa imbestigasyon.
