ILOILO CITY – Ginpangunahan sang Florete Group of Companies ang paghatag sang bulig para sa mga residente nga apektado sang Enhanced Community Quarantine (ECQ) sa syudad sang Iloilo.
Sa exclusive interview sang Bombo Radyo kay Iloilo City Mayor Jerry Treñas, tuman ang iya pagpasalamat sa pagdonar sang Florete Group of Companies sang 100 ka sako sang super white rice sa mga pumuluyo sang syudad nga apektado sang pandemya.
Suno kay Treñas, ang nasambit nga mga bugas ang i-repack kag ipanagtag sa kada barangay sa syudad.
Nahibaluan nga ang nasambit nga bugas ang nagabug-at sang 50 kilograms kada sako.
“Nagapasalamat ako nga ang Florete Group of Companies, mabulig sa aton syudad sa mga bugas nga ipanagtag man naton sa mga barangay. Sa ngalan sang syudad, nagapasalamat gid ako sa kaalwan sang Florete Group of Companies. Thank you gid.”
Luyag ipalab-ot sang Florete Group of Companies kag sang iban pa nga may bulawanon nga tagipusuon nga ang tanan nga problema kag pagpanghangkat sa kabuhi ang malampuwasan paagi sa pagbinuligay.
