Nagapati si Iloilo City Mayor Jerry Treñas nga nagakadapat kabigon sang tanan nga may yara na sang delta COVID-19 variant sa syudad sang Iloilo.
Sa interview sang Bombo Radyo kay Treñas, iya ginpahayag nga mahinay ang pag-detect sang Philippine Genome Center angot sa kaso sang delta COVID-19 variant sa pungsod rason nga indi matumod kun pila na ang pat-od nga numero sang kaso sang mas makalalaton nga virus.
Suno kay Treñas, sa Western Visayas, ang probinsya sang Antique pa lamang ang may yara sang local cases sang delta COVID-19 variant kag nagakadapat nga indi magkampante ang syudad sa diin istriktuhan na ang pagpasulod sa mga tawo.
Pahayag sang alkalde, ginapreparar na man ang mga health care center sang syudad kag ginatinguhaan nga madugangan pa ang hospital beds kag oxygen tanks.
Dugang pa ni Treñas, ang tanan nga natumod nga close contact ang gilayon nga ipaidalom sa reverse transcription polymerase chain reaction (RT-PCR) test symptomatic man ukon asymptomatic ang kondisyon.
