Indi pa maathag kun ano ang mangin sitwasyon sa syudad sang Iloilo kun matapos na ang ipatuman nga anum ka adlaw nga hard lockdown.
Suno kay Mayor Jerry Treñas, “Mahulat naman kita. Tan-awon ta ang status sang aton nga health care facility. Kun mag-improve, te lantawon ta kun ano ang maobra ta.”
Kun balik-balikan, Hulyo 16 sang ginpatuman ang enhanced community quarantine (ECQ) sa Iloilo City.
Ini ang pinakaistrikto nga quarantine status sa bilog nga pungsod, sandig sa National Inter-Agency Task Force. In-place pa ini nga quarantine classification tubtob Agusto 8, apang ipatuman ang hard lockdown suno sa alkalde ‘agud makapreparar ang ospital’ sa surge sang kaso.
Agusto 3 tubtob 8 ang pagpatuman sang hard lockdown.
Suno kay Treñas, dapat hangpon sang publiko nga ginasalo sang mga ospital sa syudad ang mga pasyente halin sa probinsya sang Iloilo bangud wala sang intensive care unit (ICU) facility sa Iloilo Province nga maka-cater sa severe COVID-19 cases.
Apisar sang ipatuman nga hard lockdown, nagpasalig ang alkalde nga magapadayon ang transportasyon kag bukas ang essential establishments.
Indi pag-untaton ang byahe bangud magluwas nga may mga ginapahanugutan man gihapon nga makabyahe kaangay sang mga APOR, kinahanglan ini para sa magapabakuna kontra sa COVID-19.
May manug-abot suno sa alkalde nga 45,000 ka doses sang Sinovac COVID-19 vaccine kag may pasalig man ang national government nga may maabot nga bakuna halin sa Moderna kag Pfizer.
ANO ANG IPAKAON SA TAWO
Aminado ang alkalde nga madamo man ang apektado bangud wala sa gihapon sang trabaho. Apang suno sa iya, may ayuda nga ihatag.
Sa Mierkules, Agusto 4, magaumpisa na ang tagtaganay sang cash aid halin sa Department of Social Welfare and Development (DSWD).
Sa P2.6 billion nga pondo sang DSWD para sa naka-ECQ nga mga lugar sa Pilipinas, P461,744,000 ang napain para sa Iloilo City.
Magluwas diri suno sa alkalde, may ginbakal man ang syudad nga mga bugas, canned goods, kag noodles nga yara subong sa Jaro Gym kag ipanagtag man sa mga pumuluyo.#
Check the content of the Executive Order here: https://www.facebook.com/1054610584577797/posts/4497723166933171/
