ILOILO CITY – Indi makamato-mato ang local government units (LGUs) sa pagdesisyon kun diin ilubong ang mga bangkay sang mga indibidwal nga mapatay sa COVID-19.
Sa interview sang Bombo Radyo kay Dr. Daphynie Teorima, Medical Officer III kag designated spokesperson sang Department of Health (DOH) Region 6, iya ginpahayag nga may mga guidelines nga dapat sundon kaangay sang 25 nga metros nga kalayuon sang burial site sa mga residential area.
Dapat man nga malayo ini sa sources of water ukon mga bubon.
Kun maghikot sa patay, ang workers sang punerarya ang dapat man nga magsuksok sang kumpleto nga Personal Protective Equipment (PPE).
Kun indi pa ma-cremate ang bangkay, dapat man ibutang sa refrigerator nga may at least -4 degrees nga temperatura.
Ang body bags nga gamiton ang dapat man nga i-disinfect gamit ang 0.5% sodium hypochlorite.
Una diri, gin-anunsya nga magauntat sang duha ka semana ang serbisyo sang Gegato Abecia Funeral Parlor and Crematorium bangud indi na ini makasarang mag-cater sang naga-inabot nga bangkay para sa cremation. #
