Nagdangat sa 43 ang oxygen tank nga napreparar na sang Iloilo City Government kasunod sang pagsulod sang COVID-19 Delta variant sa syudad.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga magluwas sa oxygen tanks, ginatinguhaan man sang syudad nga makatipon sang dugang nga hospital equipment.
Suno kay Conlu, regular man ang ginapatigayon nga pagsinapol sang sa pamunuan sang kada ospital sa syudad agud ma-monitor ang sitwasyon kag malikawan ang pagginutok sang mga pasyente.
Dugang pa niya, doble na ang pagpreparar sang Iloilo City Government nga malikawan ang malala kag mapin-ot nga sitwasyon kaangay sang nagakatabo sa iban nga pungsod tuga sang pagtimbuok sang kaso sang virus kasunod sang nagalapata nga COVID-19 Delta variant.
