Magabaton na liwat sang mga cadaver ang Gegato-Abecia Funeral Parlor and Crematorium sa masunod nga semana.
Ini nga nagaisahanon nga crematorium sa bug-os nga Panay Island ang nag-untat sa pagbaton sang mga bangkay sang nagligad nga Agusto 2.
Sa interview sang Bombo Radyo kay Fely Gegato Abecia, tag-iya sang nasambit nga crematorium, iya ginpahayag nga gin-ubos lang anay nila sa pag-cremate ang pending nga mga cadavers nga yara pa na sa ila punerarya.
Sang nagligad nga duha ka semana suno kay Abecia, indi na makontrol ang kadamuon sang mga bangkay halin sa iban nga probinsya kaangay sang Aklan kag Antique kag indi na ini masarangan sang ila machine.
Naamat-amat naman hikot ang mga patay subong suno sa natungdan kag 3 tubtub 4 ka adlaw na lang ang kinahanglan kag pwede na nga makabaton liwat sang cadavers.
Ginabanta nga kapin 50 na lang ang nabilin nga mga bangkay nga pending for cremation.
Nagpasalamat man si Abecia sa nakit-an niya nga paninguha sang local government units ilabi na sang Iloilo City Government sang nagdagsa na ang mga cadavers sa amo nga punerarya kag indi na masarangan sang crematorium.
Suno kay Abecia, may bag-o nga freezer nga baklon ang crematorium para nga mabuhin-buhinan ang problema kun magdamo pa gid ang COVID-19 casualties sa Panay Island.
Nagbulig suno sa iya ang syudad agud nga matigayon nga makapangita sang freezer.
Suno pa sa natungdan, magabulig man ang Iloilo City Government pati sa kuryente nga ginagamit sang crematorium.
