ILOILO CITY – Indi dapat magkabalaka ang mga tag-iya sang small and medium enterprises sa syudad sang Iloilo bangud madala sila sa mahatagan sang ayuda.
Pasalig ini ni Iloilo City Mayor Jerry Treñas subong nga ginpalawig pa ang enhanced community quarantine (ECQ) sa syudad tubtub sa Agusto 15.
Sa masobra P2.6 billion nga pondo ang gin-release sang Department of Social Welfare and Development (DSWD) sa mga local government units sa Iloilo Province kag Iloilo City, P461,744,000 ang napain sa syudad.
Suno kay Treñas, igu ini para sa 460,000 ka mga tawo.
Kun may 500,000 nga populasyon ang syudad, halos 40,000 lang suno sa alkalde ang indi mahatagan sang cash aid sa idalom sang Special Assistance to Individuals in Crisis Situation (AICS) sang DSWD.
May mga nagareklamo man nga negosyante nga indi sila maka-operate bangud naka-ECQ ang syudad apang amo gihapon nga buwis ang ila nga ginabayaran.
Suno naman sa alkalde, ‘tan-awon’ pa niya kun ano nga buwis ang ginasukot sang syudad kag kun ano ang mahimo diri.
