Gin-athag sang mga opisyal sa Barangay Calaparan, Arevalo, Iloilo City nga indi na active ang 11 ka mga kaso sang dengue nga na-rekord sa ila nga lugar.
Sa rekord sang City Epidemiology and Surveillance Unit (CESU), ang 11 sa Calaparan amo ang pinakamataas nga napagkit sa syudad sang Iloilo halin sa Enero 2021 tubtub Hulyo 31 subong nga tuig.
Sa interview sang Bombo Radyo kay Barangay Kagawad Rodrigo Montaño, iya ginpahayag nga naka-recover na ini tanan nga pasyente bangud sang nagligad pa ini nga mga bulan.
Aktibo suno kay Montaño ang ila nga mga residente sa clean-up. Gina-practive ang Oplan Kaya-Kulob kag ang 4S Strategy: search and destroy, self-protection measure, seek early consultation kun symptomatic, kag say “yes” to fogging sa identified areas.
Nahibaluan nga sa rekord sang CESU, patas ang Calaparan, Arevalo kag ang Caingin, Lapaz nga may tag-11 ka kaso.
Ang bug-os nga syudad ang may yara sang 264 cases halin sang Enero tubtob Hulyo.
Sa bahin sang General Services Office ukon GSO, nagaumpisa naman ang mga personnel sa pagkuha sang daan nga goma sang salakyan sa mga barangay pati na ang mga lata kag wala nakolekta nga mga basura.
Wala nadayon ang Bayanihan Versus Dengue subong nga adlaw bangud sang mamunog nga bubo sang ulan.
Ang Bayanihan Versus Dengue amo ang kada Sabado nga kampanya sang Iloilo City Government kun sa diin gina-deploy ang 300 ka street sweepers kag lima ka truck nga amo ang magabulig sa mga barangay sa mga distrito sa syudad para sa clean-up. ##
