Nagapadayon sa pagbaton ang Bureau of Quarantine-Iloilo sang mga aplikante para sa International Certificate of Vaccination (ICV) ukon kilala man nga yellow card.
Ini nga yellow card ang gina-isyu sa mga byahero nga magapadulong sa mga pungsod nga naga-require gid sang pamatuod nga fully vaccinated batok sa COVID-19 ang isa ka indibidwal.
Indi ini mandatory kag indi ini makabig nga immunity passport kundi naga-serbe lang bilang proof of vaccination.
Sa interview sang Bombo Radyo kay Dr. D’wanie Conlu, designated spokesperson sang Bureau of Quarantine (BOQ) -Iloilo, iya ginpahayag nga Agusto 12 lang gin-launch ang OBS ukon online booking system sa BOQ Iloilo.
Tatlo ang satellite stations sa Western Visayas — isa sa Iloilo (mother station), isa sa Kalibo, kag isa sa Bacolod.
Para sa mga online applicants, yari ang dapat nga tandaan:
* Pwede nga ma-book ang appointment via website nga boq.pisopay.com.ph ukon pwede man nga bisitahon ang Facebook page nga Bureau of Quarantine Iloilo
* Kun naka-book na online, kinahanglan nga personal nga kuhaon ang yellow card sa station sang BOQ
* Kinahanglan dal-on ang LGU ukon ang hospital-issued vaccination card kag LGU-issued vaccine certificate
* P370 ang bayad sa pagkuha sang yellow card (para sa certificate kag sa convenience fee)
* Indi pwede ang walk-ins bangud system-generated ini
Bangud subong lang na-launch ang OBS sa BOQ Iloilo, may yara na sang naka-book sang appointment sa iban nga satellite stations kaangay sang Cebu kag Batangas kag Metro Manila.
Kun wala pa nakuha sang traveler ang iya yellow card sa sini nga mga lugar bangud malayo ukon maawat ukon may travel restrictions, pwede gid nga makahimo liwat sang appointment diri sa Iloilo apang kinahanglan naman nga magbayad liwat.
Suno kay Conlu, ang yellow card ang may yara sang unique nga QR code para sa mas madasig nga verification sang certificate.
Ang international travelers nga may nagahilapit na gid nga flight schedules ang gina-engganyo gihapon nga mag-book online kag magpadulong sa satellite station sang BOQ.
May assistance nga ihatag ang staff sa kondisyon nga may pamatuod lang nga dala nga may yara sang impending flight.##
