ILOILO CITY- Naghingyo sang isa ka bulan nga ligwa ang kampo ni Senator Manny Pacquiao antes niya tutukan ang iya plano sa pulitika para sa nagahilapit nga 2022 elections.
Sa interview sang Bombo Radyo kay former Bacolod City Mayor Monico Puentevella nga kilala nga kaalyado ni Pacquiao, iya ginpahayag nga sa tion nga makapauli na ang fighting senator sa Pilipinas matapos ang naangkon nga kapaslawan sa kamot ni Yordenis Ugas sang Cuba, magapakigsugilanon ini sa mga kilala nga politiko.
Suno kay Puentevella, nalakip sa posible istoryahon ni Pacquiao amo ang mga opposition leaders lakip na si Vice President Leni Robredo, 1Sambayan kag iban pa nga mga partido.
Pahayag ni Puentevella, diri posible madesisyunan na sang senador kon madayon ang iya plano nga magpadalagan sa pagka-presidente.
Ginpalagtikan naman ni Puentevella ang mga personalidad lakip na si Sen. Bato dela Rosa nga suno kay Puentevella,nagsakay lang sa popularidad ni Pacquiao sadto apang subong nga kontra na ni Pacquiao ang mga Duterte, wala na nagpabatyag ang mga ini.
