Maga-agaway sang boto sang mga Ilonggo ang pila ka Iloilo-based party-list groups sa nagahilapit nga 2022 elections.
Indi kaangay sang natabo sang nagligad nga 2019 party-list elections nga ang grupo lamang nga AAMBIS-OWA ang naghalin sa Iloilo, nahatagan naman subong sang Commission on Elections (Comelec) sang accreditation ang Uswag Ilonggo party-list.
Ang Uma Ilonggo ukon “Ugyon Mangunguma, Mangingisda kag Mamumugon nga Ilonggo” ang ginapahayag nga nagatapos man sang accreditation para sa regional representation sa masunod nga piniliay.
Sandig sa 1987 Constitution, ang party-list system sa Pilipinas ang isa ka mekanismo nga nagapanigurado nga ang lain-lain nga sektor sa sosyudad partikular na ang disadvantaged groups ang makaangkon sang representation sa Kongreso.
Sa kada eleksyon, kada botante ang mahimo lamang makaboto para sa isa ka partylist.
Ang grupo nga makadaog sang at least 2% sang national vote ang mahatagan sang isa ka seat sa Kongreso.
Santo sa available nga data sa Comelec sang nagligad nga 2019 elections, sa kabug-usan nga nagboto sa Pilipinas, 58.95% lamang ang nagboto sang party list group.
Sa interview sang Bombo Radyo kay Atty. Wil Arceño, election supervisor sa probinsya sang Capiz, iya ginpahayag nga sa Western Visayas, may yara pa gid sang dugang nga mga grupo nga nagatapos sang requirements for accreditation sa Comelec.
Gin-engganyo ni Arceño ang publiko nga indi pagpalipat-lipatan ang pagboto sa party-list, magluwas pa sang pagboto sa mga local kag national candidates. “Don’t forget. Pili ka sang sektor nga nagarepresentar sang imo nga interes. That is part sang imo sectoral representation sa Congress.”
Santo sa results sang OCTA Research survey nga ginpatigayon sang Hulyo subong nga tuig, one-third ukon 34% sang adult Filipinos ang wala nakahibalo kuno ano ang party-list system.
“That’s representing a certain sector. Importante ina kay mangin additional congressman ina. May additional nga benefits nga mabaton ang tawo… ang sakop nga sektor. Dapat indi ina pagbalewalaon sang aton nga mga kauturan,” pahayag ni Arceño.
