Na-cremate na ang bangkay ni Guimbal, Iloilo Mayor Oscar ‘Oca’ Garin, ang patriarch sang isa sa pinakamabaskog nga political clans sa probinsya sang Iloilo.
Kasunod ini sang ginpatigayon nga send-off caravan kagab-i nga naghalin sa banwa sang Guimbal tubtub sa syudad sang Iloilo.
Ang caravan ang gin-updan sang Pamilya Garin, mga abyan sang alkalde, kag mga kaalyado sa pulitika.
Ginatos ka mga salakyan ang nag-upod sa amo nga caravan.
Nagpakita naman sang simpatiya ang mga pumuluyo sa mga banwa sa premier distrito paagi sa pagsindi sang kandila kag pagbantay sa higad sang dalan.
Sa nangin mensahe ni anay Iloilo First District Representative Engineer Richard Garin, subang nga anak sang alkalde, iya ginpasalamatan ang tanan nga nagpangamuyo para sa iya nga amay sang naospital ini sa sulod sang 12 ka adlaw matapos nagpositibo sa COVID-19.
Ginbalikan man sini ang maayo nga hinimuan sang iya amay sang nagserbe ini bilang lider: magluwas sa iya multiple terms bilang alkalde sang Guimbal, nakapangalagad man ini bilang mamalidha sa premier distrito sa apat ka termino (1987‐1992, 1992‐1995, 1995‐1998, 2001‐2004).
Nakaagi man siya nga nangin administrador sang Philippine Coconut Authority.
‘GUSTO MAGPAULI’
I-libot sa premier distrito subong nga adlaw, Septyembre 27, ang abo sang bangkay ni Garin. Ini ang pasalig sang pamilya bilang pagtuman sang gusto sang alkalde nga makapauli gid sa ila nga balay.
Ibutang man sa ila nga balay ang abo, ipatigayon ang misa kada gab-i, kag idul-ong man ang abo sa ila nga family memorial park kun sa diin pwede makabisita ang mga tawo sa Guimbal kag iban pa nga banwa sa first congressional district.
