Ligom-dulom pa ang Passi City Police Station kun sin-o ang responsable sa pag-ambush sa isa ka van sa Barangay Aglalana, Passi City, Iloilo kun sa diin duha ang patay kag isa ang napilasan.
Wala man sang bastante nga ginauyatan ang pulis kaangot sa background sang mga biktima sa amo nga krimen.
Sa amo nga insidente sang Sabado, Septyembre 25, patay sanday Jennylyn Griño, 32, residente sang Tanza Esperanza, Iloilo City Proper, kag Jomar Fuentes, residente sang Panit-an, Capiz.
Napilasan si Kenneth Campos Dorado, tumandok sang Bahit, Panit-an, Capiz.
Sa interview sang Bombo Radyo kay Pol. Lt. Col Dennis Pamonag, hepe sang Passi City Police Station iya ginpahayag nga i-subject pa sa autopsy examination ang bangkay sang duha.
Yara naman sa estable nga kondisyon si Dorado. Sandig sa panaysayon sini sa mga pulis, antes ang ambush, may mga pamahog na siya nga nabaton nga kaangot sa iya nga daan nga mga kaso.
Sandig sa nauna nga interviews sang Bombo Radyo, nadakpan anay si Dorado sa drug buy bust sa Roxas City sang 2009 kag naka-guwa sa presuhan sang 2016.
May kaso man ini nga frustrated murder.
As of press time, i-follow up pa sang Passi City PNP ang daan nga mga kaso sang babayi nga biktima nga si Griño.
Sandig sa interview sang Bombo Radyo sa punong barangay sang Tanza Esperanza, tatlo ka bulan pa lang ang nakaligad sang nakagwa sa presuhan si Griño bangud nadakpan ini sa drug buy bust operation.
Si Fuentes ang ginapahayag wala man sang rekord sa barangay kag pulis apang ‘naga-upod upod lang kay Dorado’.
Wala man sang ihibalo ang mga pulis sa identity sang mga suspek.
Wala man sila sang hawid sa plate number sang salakyan.
Una nga ginpahayag sa Bombo Radyo nga sang natabo ang krimen, nakopya sang mga bikers nga FEN -202 ang plate number sang Toyota Vios nga ginsakyan sang ginapahayag duha ka gunmen.
