Ginsaylo na lang sa barangay hall ang isa ka lungon sa Barangay Poblacion Ilaya, Zarraga, Iloilo bangud wala gihapon naga-subside ang tubig-baha tuga sang mamunog nga ulan.
Sa interview sang Bombo Radyo kay Punong Barangay Jasper Garde, iya ginpahayag nga sa ila na lang nga barangay hall ihaya ang patay tubtub nga mag-abot ang schedule sang lubong sini.
Ginkuha ini sa ila nga balay bangud isa na lang ka dangaw kag malab-ot na sang tubig ang lungon nga gintungtong sa ibabaw sang lamesa.
Suno kay Garde, duha ka areas sa ila nga lugar ang natam-an sang baha: ang isa ka subdivision kag ang Sitio Tondo kun sa diin lunsay taga-hawak na ang kataason sang tubig-baha.
Halin pa sang Lunes sang naapektuhan sang baha ang amo nga mga lugar.
