Nagpakig-angot na ang mga pulis sa Iloilo City sa Dueñas Municipal Police Station agud padalman ang kaso sang pagluthang-patay sa Filipino-Pakistani businessman sa Fort San Pedro, Iloilo City Proper.
Ang biktima nga si Hamza Kayani, 31, residente sa West Timawa, Molo, Iloilo City, ang ginapahayag nga may pamilya sa banwa sang Dueñas.
Sa interview sang Bombo Radyo kay Police Captain Shella Mae Sangrines, hepe sang Iloilo City Police Station 1, iya ginpahayag nga ginauna ang anggulo sa away sa pamilya ni Kayani.
May mga gin-request nga dokumento ang mga pulis nga amo pa ang ginahulat subong.
Wala man ginadula ang anggulo nga posible may kaaangtanan ang krimen sa kahilabtanan anay ni Kayani sa iligal nga droga.
Ginahulat subong ang resulta sang autopsy exam sa bangkay ni Kayani amo man ang statement sang mga menor-de-edad nga amo ang kaupod sang biktima sang ginpatay ini sang Sabado sang gab-i.
