May lead na ang mga pulis sa suspek nga nag-ransak kag nagtaban sang masobra P600,000 nga cash sa isa ka convenience store sa Leon, Iloilo.
Sa interview sang Bombo Radyo kay Police Lt. Melchor Tolentino, hepe sang Leon Municipal Police Station, iya ginpahayag nga ang amo nga suspek ang may daan nga mga rekord sang pagpangawat sa probinsya.
May picture nga dala ang mga pulis kag na-identify ini sang kahera sa amo nga establisyemento.
Sandig sa panaysayon sang kahera, masami nga yara sa amo nga store ang suspek kag nakilala niya ini bangud ginpapanaug sini ang iya facemask sang natabo ang pagpangawat.
Nagpamalibad ang pulis nga isapubliko ang pangalan sang suspek bangud nagapadayon pa ang imbestigasyon.
