Nagpadala ang local government unit sang Janiuay sang duha ka backhoe sa Sito Gamad, Barangay Jibolo sa amo nga banwa kasunod sang gin-report sang mga residente nga daw mahulog na ang ila nga mga balay sa suba bangud sa pag-usmod sang duta.
Ang duha ka backhoe ang gingamit para sa pag-rechannel sang suba.
Sa interview sang Bombo Radyo kay Joven Baranco, head sang Municipal Disaster Risk Reduction and Management Office (MENRO), iya ginpahayag nga kapin 15 ka mga balay ang yara malapit sa pangpang sang suba kag yara sa katalagman kun magtiphag ang duta.
Wala man sang nag-evacuate apisar sang amo nga sitwasyon.
Magluwas sa Sitio Gamad sa Barangay Jibolo, nag-deploy man sang Local Government Unit (LGU) sang backhoe sa Barangay Caranas sang nagligad nga adlaw bangud may mga pamalay man nga malapit na lang madagdag sa suba.
Indi makasarang ang backhoe sa rechanelling gani nga nag-augment ang bulldozer halin sa Iloilo Provincial Engineer’s Office.
