Duha ka tuig pa lang sa serbisyo sa hanay sang Philippine National Police (PNP) si Patrolman Jake Salgado, ang police officer nga ginpasakaan sang kaso bangud sa ginapahayag tuyo nga pagpatay sa agent sang Philippine Drug Enforcement Agency (PDEA) sa Barangay Cabug, Bacolod City.
Agusto 2019 sang nagsulod sa serbisyo si Salgado.
Halin sa iya mother unit nga Regional Personnel Holding and Accounting Unit (RPHAU), gin-assign ini sa Iloilo City Police Office (ICPO) kag na-detail bilang station guard sa Jaro Police Station.
Sa interview sang Bombo Radyo kay Pol. Lt. Col. Arnel Solis, spokesperson sang PRO VI, iya ginpahayag nga suspended si Salgado halin sang Oktubre 1 bangud sang less grave neglect of duty. Tubtub sa Oktubre 31 ang suspension ni Salgado. Hibaluon pa kun sa ano ang partikular nga nalapas sang amo nga pulis.
Si Salgado ang tumandok sang Purok 1, Magsungay, Barangay Singcang-Airport, syudad sang Bacolod.
Nalakip siya sa ginpasakaan sang kaso nga frustrated murder bangud sa ginapahayag pagpangamot sa pagluthang sa PDEA agent sang Jason Yayola sang Oktubre 5 sang gab-i.
Sandig sa inisyal nga imbestigasyon sang Bacolod PNP, nagbuligay sanday Salgado kag isa pa ka babayi nga si Jenelyn Manto, 24, residente sang Bacolod, agud mapatigayon ang krimen apang maswerte nga nakaluwas ang PDEA agent.
Ginapahayag may kaangtanan ini sa drug operation sang nagligad nga Pebrero 2 bangud gina-alegar nga ang drug personality nga gin-aresto sang PDEA agent amo ang abyan ni Patrolman Salgado kag abyan sang nobyo ni Manto.
