Mismo si Pol. Col. Pablito Asmod Jr., director sang Guimaras Police Provincial Office (GPPO), ang nagmandu nga mag-deploy sang mga pulis sa balay nanday Claire Diergos sa Barangay New Poblacion, Buenavista, Guimaras.
Kahapon, Oktubre 29, sang gindala ang bangkay ni Claire sa amo nga puluy-an.
Sa interview sang Bombo Radyo kay Police Captain Anton Von Winkle Lamson, hepe sang Buenavista Municipal Police Station, iya ginpahayag nga luyag lang sang hanay sang PNP nga “mapahamtang ang buot sang pamilya” kag “indi mahadlok”.
Indi pag-ihambal ni Lamson kun pila gid ang exact number sang pulis nga ginpabantay sa balay bangud “basi gina-measure man sang iban.”
Indi klaro kun sin-o ang “naga-measure” sa hulag sang pulis ukon sa sitwasyon sang pamilya, apang suno sa hepe, “gindugang lang ang deployed personnel para sa seguridad sang pamilya.”
Nahibaluan nga yara sa paghinakop sang pamilya Diergos ang tatlo ka tuig nga anak nga babayi ni Claire nga kaupod man mismo niya sang gab-i nga ginpatay siya.
Una na nga ginkumpirma ni Samuel Diergos, amay ni Claire, nga makahambal na ang iya nga apo apang “basi na-trauma” bangud wala gid ini sang ginamitlang may kaangtanan sa posible pagka-saksi sini sa krimen nga natabo sa iya nga iloy.
Kun basehan naman ang una nga interview sang Bombo Radyo kay Police Major Raymond Celoso, hepe sang Sta. Barbara PNP, may kaangtanan sa posibilidad “nga gin-spare sang kriminal ang anak ni Claire nga daw kaangay nga may pag-ulikid ini sa bata”, ginpahayag ni Celoso nga “ang perpetrator lang mismo ang makasabat sa sini nga pamangkot.”
Nagapati ang mga pulis nga indi lang isa ang kriminal kag posible man suno sa otoridad nga may ikasangkol gid sa pagpatay ang tawo nga responsable sa amo nga krimen.
