Mga bata ang isa sa mga ginatutukan-bantay sang mga pulis sa syudad sang Iloilo kasunod sang paghalog sang mga restrictions.
Ini bangud kadungan sang pag-lift sang curfew sa syudad, daw nalipatan naman suno sa Iloilo City Police Office (ICPO) nga in place sa gihapon ang curfew ordinance nga para sa mga menor de edad.
Nagpahanumdom ang ICPO sa mga ginikanan nga pagpatak sang 10:00 sa gab-i, dapat siguraduhon nga wala na nagapaliwa-liwa sa guwa ang ila mga kabataan.
Sa interview sang Bombo Radyo kay Pol. Captain Shella Mae Sangrines, spokesperson sang ICPO, iya ginpahayag nga indi man pwede ang mga bata sa mga balay-ilimnan. Matandaan nga napahanugutan naman umpisa sang nagligad nga semana ang pagserbe sang alcoholic drinks sa mga resto bar sa syudad.
Unvaccinated pa ang mga bata suno kay Sangrines kag dapat gihapon nga hagan-haganon ang pag-guwa.
Nagpangayo man sang bulig ang ICPO sa mga barangay agud epektibo nga mapatuman ang mga pagsulundan.
