Ginkabig ni pastor Apollo Quiboloy ang iya kaugalingon nga ‘modern-day Joseph’ matapos nga nalakip ini sa ginpagwa nga wanted list sang US Federal Bureau of Investigation (FBI) bangud sa sex trafficking kag iban pa nga kaso.
Suno kay Quiboloy, kaangay sang character sa bibliya nga si Joseph, nangatubang man ini sang tribulations ukon kabudlay.
Nag-pagwa sang online sermon si Quiboloy sa iya followers isa ka adlaw matapos naggwa ang advisory sang FBI nga ini ang lakip sa gina-alegar “conspiracy to engage sa sex trafficking by force, fraud and coercion kag sex trafficking of children; conspiracy; bulk cash smuggling.”
Suno sa FBI, kun sino man ang may impormasyon angut kay Quiboloy ang mahimo nga mag contact sa pinakalapit nga American Embassy ukon consulate.
Samtang, suno naman kay Dr. Marlon Rosete, presidente sang Sonshine Media Network International, ang broadcast entity nga ginpanag-iyahan sang pastor, magahold sang press conference subong nga adlaw ang legal team ni Quiboloy agud nga i-adress ang amu nga issue.
Wala pa man nabaton sang Philippine National Bureau of Investigation (NBI) ang “formal communication” halin sa FBI.
Ang dugang nga yara sa wanted list sang FBI ang konektado man kay Quiboloy nga sanday Teresita Tolibas Dandan kag Helen Panilag.
Nahibalu-an nga gin-indict sa US sang sex trafficking si Quiboloy kaupod ang pila pa ka myembro sang iya nga simbahan sang tinalikdan nga tuig.
