Nabaton na ni Maasin, Iloilo, Mayor Francis “Ansing” Amboy ang certificate nagikan sa Department of the Interior and Local Government (DILG) nga nagapamatuod nga cleared na ang iya pangalan sa narco list ukon lista sang mga pangalan sang mga opisyal sang gobyerno nga naangot sa pagbaligya ukon pagbakal sang iligal nga droga.
Matandaan nga sang 2016, masobra 150 ka mga opisyal naggikan sa judiciary, police kag local governments ang ginpangalanan ni Presidente Rodrigo Duterte nga ginapahayag naangot sa drug trade.
Sa interview sang Bombo Radyo kay Mayor Amboy, iya ginpahayag nga nagapasalamat siya nga naggwa gid man ang kamatuoran kag nahilway ang iya pangalan.
Suno kay Mayor Amboy, halos apat man ka-tuig ang iya ginhulat bag-o ma-clear ang iya pangalan.
Apang sa pihak sini, nagpasalamat man ang alkalde sa pumuluyo sang Maasin kalakip na sa iya pamilya nga nagapati sa iya kag nagasuporta bisan madamo sang alegasyon nga ginahaboy batok sa iya.
