Ginpaathag sang Philippine Red Cross (PRC) kun sa diin nagakadto ang fees nga gina-collect sang organisasyon apisar nga non-profiting ang tanan nga blood facilities sini.
Sa idalom sang Department of Health (DOH) Administrative Order 2015-0045, ginapahanugutan ang pagsukot sang processing fee para sa mga tawo nga nagapalapit sa Red Cross nga nagakinahanglan sang dugo.
Yari ang processing fees depende sa blood component:
Whole Blood – P1,800
Fresh frozen plasma – P1,000
Packed Red Blood Cells – P1,500
Sa interview sang Bombo Radyo kay Dr. Catherine Leslie De Asis Javellana, medical officer sang PRC – Iloilo, iya ginpahayag nga ang gina-collect nga processing fees ang nagakadto sa tests nga gina-conduct antes itughong ang dugo sa pasyente.
Ginapatigayon ini nga test sa hepatitis B, hepatitis C, HIV, test for syphilis kag test for malaria agud nga masigurado nga safe.
Una na nga nagpanawagan sang bulig ang PRC sa mga taga-Iloilo nga magdonar sang dugo bangud kulang ang suplay sang probinsya subong nga limitado ang blood donation activities bangud sa Covid-19 pandemic.
Labi ini nga kinahanglan subong nga tuig suno kay Javellana bangud subong nga 2022 ang third year sang three-year cycle sang dengue outbreaks sa Iloilo rason nga gina-project ang posible spike sa kaso.
