Gintupok sang kalayo ang balay sang isa ka senior citizen sa Barangay La Granja, Lapaz, Iloilo City.
Ang balay ang ginapanag-iyahan ni Norma Catalan.
Sa interview sang Bombo Radyo kay Catalan, iya ginpahayag nga ginbilin niya nga nagabaga ang uling bangud naggwa siya agud magbakal sang pagkaon.
Pagbalik sang tigulang, nasunog na ang iya nga puluy-an.
Madasig ang paglamon sang kalayo bangud human sa light materials ang balay. Wala gid sang bilin sa mga gamit sang biktima.
Maswerte naman nga napaguwa sang mga kasilingan sang anak ni Catalan nga indi man makadali-dali sa paghulag bangud nakaagi nga na-stroke.
Problema pa sang tigulang kun sa diin na magatinir bangud sa natabo nga sunog.
