Bukas nga magbaton ang Probinsya sang Iloilo sa tanan nga mga kandidato nga nagapadalagan sa national positions sa kondisyon nga kinahanglan sundon sang mga ini ang guidelines nga nakasaad sa Commission on Election (COMELEC) Resolution 10732.
Nahibalu-an nga suportado ni Iloilo Governor Arthur Defensor Jr ang kandidatura ni Vice President Leni Robredo sa pagka-Presidente.
Sa interview sang Bombo Radyo kay Iloilo Governor Arthur Defensor Jr., iya ginpahayag nga dapat indi pagkalimtan ang mga ‘basic’ minimum health protocols para sa siguridad sang mga tagtumalambong sa isa ka campaign rally ukon caravan sang mga politiko.
Nahibalu-an nga sa idalom sang section 14 sang COMELEC resolution 10732 ang mga masunod nga aktibidad ang ginadumili-an in-person campaign sa tanan nga category levels:
a. pagsulod sa balay samtang nagapatigayon sang house-to-house
campaigning, bisan pa nga may pahanugot naghalin sang tag-iya
b. pagtuga sang pagtinumpok sang mga tawo ukon magpadulong sa crowded nga lugar nga posible magalapas sa minimum public health standards
c. pagkamustahanay, haksanay, kag halukay ukon ano man nga sahi sang akto nga naga-involve sang physical contact sa tunga sang kandidato, kaupdanan sini kag ang publiko.
d. Pagkuha sang selfies, photographs kag iban pa nga aktibidad nga naga-require sang close proximity sa tunga sang kandidato, kaupdanan sini kag ang publiko kag;
e. pagpanagtag sang pagkaon kag ilimnon
Liwat man nga ginpahanumdom sang Gobernador nga indi dapat mangin rason sa paglapta sang virus ang pagpangampanya.
