Tatlo na ka tuig ang antus sang mga residente sang Barangay Bolilao, Mandurriao, Iloilo City matapos nga nagduag green ang tubig nga nagagwa sa ila nga bumba.
Sa interview sang Bombo Radyo kay Mr. Roberto Villegas, residente sa amu nga lugar, iya ginpahayag nga nagsugod ang amu nga problema sang nag-umpisa sa pag-operate ang isa ka BPO company nga nahamtang sa isa ka malapit nga building sa ila nga barangay.
Suno kay Villegas, indi na magamit pangligo kag pangluto ang tubig nga nagagwa sa ila nga bumba.
Dugang pa niya, wala sang baho ang tubig apang ini ang malan-ug ukon mahigko amu nga wala na ini ginagamit sang mga tawo.
Samtang, pahayag naman sang Barangay Official, wala sila sang nabaton nga reklamo angut sa amu nga concern sang pila ka mga residente.
Sa interview sang Bombo Radyo kay Kagawad Wilah Flores, iya ginpahayag nga ang ila lang nahibaluan nga masami reklamo sang mga residente amu ang makini nga tubod sang gripo.
Suno kay Flores, padulungan sang barangay ang nasambit nga lugar agud nga ma-address ang problema sang mga pumuluyo.
