Imbestigaran na sang Environmental Management Bureau (EMB) Region VI ang reklamo sang mga residente sa Barangay Bolilao, Mandurriao, Iloilo City kaangot sa green nga tubig nga naga-guwa sa ila nga mga bomba.
Una diri, ang residente nga si Mr. Roberto Villegas ang nagmato-mato padulong sa opisina sang EMB agud magdala sang sample sang amo nga tubig.
Sa interview sang Bombo Radyo kay Villegas, iya ginpahayag nga nakibot man ang EMB bangud daw ‘gasolina’ na ang itsura sang discolored water.
Sandig sa reklamo, naga-green kag kun kaisa, naga-dark green ang duag sang tubig nga indi naman maggamit sa pampaligo kag pagluto sang pagkaon sa balay.
Suno kay Villegas, subong nga adlaw maga-conduct sang test ang EMB sa Barangay Bolilao.
Una na nga gin-alegar sang mga residente nga nag-umpisa ang problema sa ila nga tubig sang nagsugod man sa pag-operate ang isa ka Business Process Outsourcing (BPO) company nga nahamtang sa isa ka malapit nga building sa ila nga barangay.
