Mangin magahod ang probinsya sang Iloilo kadungan sang mangin komemorasyon sang ika-36 nga anibersaryo sang 1986 People Power Revolution nga amo ang nagsipa sa pwesto sa anay diktador nga si late President Ferdinand Marcos, Sr.
Sandig sa gin-isyu ni Iloilo Governor Arthur Defensor, Jr. nga Executive Order No. 136, yari ang mga balantayan nga aktibidad sa probinsya:
Sa Pebrero 25, patigayunon ang Freedom Rally sa Iloilo Provincial Capitol Grounds umpisa 8:00 sa gab-i.
May Freedom Countdown man nga himuon tubtub sa mismo oras kun san-o nagbiya si Marcos sa Pilipinas sang 1986. 9:25 p.m. ang exact time.
Ang Freedom Countdown ang pagasundan naman sang People Power Noise Barrage nga himuon 9:25 sa gab-i.
Tanan nga ahensya sang gobyerno, establisyemento, sektor, kag households ang gina-engganyo nga magpartisipar sa amo nga noise barrage, kag tanan nga simbahan ang gina-hingyo man nga magbagting sang lingganay sa amo man nga oras.
Sa programa, imbitado ang mga alkalde sa probinsya.
Ang People Power Noise Barrage ang pagasundan sang People Power Caravan kun sa diin ang mga salakyan nga nagpartisipar sa Freedom Rally ang magapatigayon naman sang motorcade sa lain-lain nga bahin sang probinsya kag syudad sang Iloilo.
Halin subong nga adlaw tubtub sa Pebrero 25, dapat man nga naka-display ang Philippine flags sa government offices, establishments, sectors, kag households.
Gin-athag ni Defensor nga ini nga mga aktibidad ang ginbalay sandig sa Memorandum Circular No. 2022-012 sang Department of the Interior and Local Government (DILG).
Ang amo nga circular ang naga-encourage sa local governments nga magdumdom sang 1986 revolt sa ila tagsa ka mga lugar.
‘WE DON’T WANT TO FORGET IT’
“Ang gusto lang naton nga mensahe, ang People Power Revolution ari man di sa syudad kag probinsya sang Iloilo, in the same manner that it was in EDSA,” suno kay Defensor.
“We want to preserve our history. We don’t want to forget it, and we don’t want to change it,” dugang pa sang gobernador.
Subong nga tuig, ang commemoration sang EDSA ang may tema nga “Pagtutulungan Tungo sa Sama-Samang Pagbangon Mula sa Pandemya.”
‘WALA POLITICAL COLOR’
Gin-athag man ni Defensor nga paagi ini sa pag-preserbar sang legacy sang People Power, kag wala sang reference sa anuman nga political color.
Ginpanginwala man ni Defensor nga ang mga aktibidad ang may labot sa kampanya kag pag-abot ni 2022 presidential candidate kag former senator Ferdinand Marcos Jr. sa probinsya sang Iloilo.
Si Bongbong ang magaabot sa Iloilo sa Pebrero 24 — bisperas sang People Power Anniversary.
Kaupod sini si vice presidential candidate and Davao City Mayor Sara Duterte para sa grand rally sa Barotac Nuevo, Iloilo.
Wala man na-mensyonar kun mangin kabahin sang commemoration activities sa Iloilo Province sanday Vice President Leni Robredo kag Senator Kiko Pangilinan.
Ang Leni-Kiko tandem ang magaabot sa Iloilo sa mismo Pebrero 25. ##
