Indi lang pagsuspinder sang excise tax sa fuel products ang dapat nga himuon sang gobyerno kun luyag gid man sini nga mabuligan ang mga driver — may krisis man ukon wala.
Sa interview sang Bombo Radyo kay Iloilo City Councilor Atty. Rommel Duron, chairman sang Committee on Transportation sa Iloilo City Council, iya ginpahayag nga tion naman ini agud ibalik ang oil price stabilization fund.
Sang ginpasar ang Downstream Oil Industry Deregulation Act of 1998, na-abolish ang Oil Price Stabilization Fund kag nawad-an kontrol ang gobyerno sa increase nga ginahimo sang oil companies.
Apang kun ma-amyendaran ang current law kag magabalik ang Stabilization Fund suno kay Duron, indi na kinahanglan nga may fare increase bangud ang Oil Price Stabilization Fund ang magasabat sa pondo nga para sa drivers.
Ginpahayag man sini nga indi na kinahanglan sang gobyerno nga hulaton ang krisis antes nga madumduman nga bululigan gali ang mga driver nga nagatalang-talang bangud halos kada semana gid ang pagtaas sang presyo sang gatong.
Una diri, unanimously approved man sa konseho ang resolusyon nga naga–endorso sang letter sang Western Visayas Transport Cooperative (WVTC) sa Department of Energy (DOE) agud nga isuspinde ang value-added tax kag excise tax sa gatong.
Una na nga nagpahayag ang WVTC nga kun wala sang intervention halin sa DOE antes matapos ang Pebrero, iduso gid sang transport sector ang ila nga petition nga pasakaan sang P2.50 ang minimum fare sa tradisyonal kag modernized nga mga jeep.
Sa bahin sang national government, una na nga ginpahayag sang inter-agency Development Budget Coordinating Committee (DBCC) nga malapit na lang nga iga-release ang P2.5-billion fuel subsidy para sa mga driver. ##
