Himuon nga feeder port ang pantalan sang Concepcion, Iloilo nga maka-cater sang inter-island nga mga barko nga nagabyahe pa-Cebu, Negros, kag Manila.
Kabahin ini mga improvement nga ginaplano para sa amo nga pantalan kun maaprubahan na sang Philippine Ports Authority (PPA) ang hingyo nga itugyan sa local government unit (LGU) ang pagdumala sa port facility.
Sang nagligad lang nga session sang Iloilo Provincial Board, gin-aprubahan na ang resolution sang Sangguniang Bayan sang Concepcion nga himuon nga LGU-managed ang Concepcion port.
Gin-certify man ni Iloilo Governor Arthur Defensor, Jr. ang urgency sang amo nga request.
Sa interview sang Bombo Radyo kay Mayor Dr. Raul Banias, iya ginpahayag nga may gina-request na subong nga P490-million nagikan sa Philippine Rural Development Project nga amo ang gamiton para sa pagpasanyog sang pantalan.
Kun maaprubahan sang PPA ang request sang LGU, ang banwa na ang bahala sa operasyon kag maintenance sang port facility kag sa ila man magakadto ang income.
