Wala nanaman sa opisina sang Land Transportation Franchising and Regulatory Board (LTFRB) si Regional Director Richard Osmeña sa adlaw nga ginkasugtan nga ini ang magpakigkita sa mga drivers sang Public Utility Vehicles (PUV) sa syudad.
Sa interview sang Bombo Radyo kay Rey Cachuela, presidente sang Transport Alliance for Peace and Sustainable Development, iya ginpahayag nga nag-set sila sang schedule sa LTFRB agud nga ila ma-istoryahan ang pagpaathag angut sa PUV modernization program.
Ang PUV modernization program amu ang pagdula sang mga traditional jeepneys, ukon bus nga naglawig na sang masobra sa 15 ka tuig.
Tuyo kuntani sang mga drivers nga mabati-an ang paathag kag pinal nga desisyon ni Osmeña angut sa renewal sang ila nga prangkisa.
Nahibaluan nga tubtob na lang sa Abril ang renewal sa franchise sang mga PUV.
Dugang pa nga tuyo ipalab-ot nga concern sang mga drivers amu ang ila request nga magpasaka sang P1 sa P10 nga regular nga pamasahe.
Ginakahangaw-an sang mga drivers ang padayon pa nga pagsaka sa presyo sang gatong amu nga nagasinggitan ang mga ini nga gilayon maaprubahan ang ila request nga pataasan sa P11 ang plete.
