Sinuyaay ang ginalantaw rason kun ngaa nag-rinambol ang mga menor-de-edad sa Iloilo River Esplanade 2 nga sakop sang Barangay San Pedro, Molo, Iloilo City kagab-i.
16 tanan ka mga bata ang nadalahig sa amo nga grupo kag ginapahayag nga myembro pa sang gang.
Sa interview sang Bombo Radyo kay Punong Barangay Karl Lapascua sang amo nga lugar, iya ginpahayag nga duha ka mga bata ang nagikan sa San Pedro kag isa diri ang napilasan.
Ang iban ang nagikan sa Barangay Tap-oc kag Katilingban sa Molo, kag may yara man nga nagikan sa lain nga distrito.
Wala man sang gingamit nga patalom ang mga bata. Suno kay Lapascua, posible nga madugay na nga may inaway ang amo nga mga grupo kag nagkitaay lang ang banas kagab-i.
Ginpahayag sang punong barangay nga napatawag na liwat ang amo nga mga bata amo man ang ila ginikanan agud nga malaygayan.
Magapatigayon man ang mga ini sang community service sa Iloilo River Esplanade subong nga bulan. ##
