Nagapanawagan ang mga driver sang jeep nga nagabyahe halin sa Mohon Terminal nga sapakon man sang Iloilo City Government ang ila reklamo kaangot sa mga jeep halin sa probinsya nga ginatudlo wala nagasunod sa Perimeter Boundary Ordinance sang syudad.
Ang amo nga ordinansa sang syudad ang naga-kontrol kag naga-regulate sang pagsulod sang public utility jeepneys, cargo vans kag mga bus halin sa probinsya sang Iloilo kag sa iban pa nga kaiping nga probinsya.
Ang ginapahanugutan lamang nga makasulod amo ang may yara sang car passes, apang ang wala sang bitbit nga car passes ang tubtub lamang sa gin-designar nga transport terminals sa peripheral barangays sang syudad.
Sa interview sang Bombo Radyo kay Carlos de Asis, presidente sang Villa-Mohon Association sa Arevalo, Iloilo City, iya ginpahayag nga may mga driver sang jeep halin sa probinsya nga nagapinagusto lang sa pagsulod sa syudad kag naga-pick up sang pasahero nga iya na kuntani sang mga jeep sa syudad.
Suno kay de Asis, may yara man sang mga drivers nga nagadiskarte pa sa pagpasa-pasa ang ila nga car passes.
Nagahingyo ang mga driver nga aktuhan man ini nga reklamo bangud makaluluoy man suno sa iya ang city-loop jeepneys bangud ginadalahig ukon ginaagaw ang ila nga mga pasahero. ##
