Ginaplano sang Philippine Councilors League (PCL)- Iloilo Chapter nga patigayunon ang ila nga term-end assembly sa isla sang Boracay sa ulihi nga semana ang Mayo ukon sa una nga semana sang Hunyo.
Sa interview sang Bombo Radyo kay Ex-Officio Board Member Ramon Sullano, Interim President sang PCL-Iloilo Chapter, iya ginpahayag nga may mga gina-konsiderar pa man ang mga konsehal kaangay sang Covid-19 situation ukon ang alert level status nga iga-anunsyo sang National Inter-Agency Task Force (IATF).
Depende man ini sa available nga pondo suno kay Sullano.
Mayorya suno kay Sullano ang pabor nga sa Boracay hiwaton ang assembly agud may break man ang mga konsehal pagkatapos sang eleksyon.
Tatlo man ka tuig suno kay Sullano nga wala man naka-guwa ang mga konsehal kag diri lang sa Iloilo ginapatigayon.
Ginaplano nga sa amo nga assembly, may igahatag nga plaque of appreciation kag token bilang souvenir sa mga katapo sang PCL-Iloilo nga magatapos na ang termino subong nga tuig.
