Magaupod gihapon ang syudad sang Iloilo sa ika-apat nga phase sang National Vaccination Days ukon kilala nga “Bayanihan, Bakunahan” apang patigayunon na ini subong sa mga barangay.
Patigayunon ang Bayanihan, Bakunahan Part IV subong nga adlaw, Marso 10, tubtub sa Marso 12.
Ang vaccination rate sa syudad sang Iloilo ang naglapaw na sa target population apang suno kay Mayor Jerry Treñas, magatutok ang city government sa mga bata edad 5-11 anyos.
Sa interview sang Bombo Radyo sa alkalde, iya ginpahayag nga idul-ong man ang booster shots sa mga barangay kag sa mga lugar nga ginatrabahuan mismo sang mga tawo.
Una diri, ginpahayag sang alkalde nga plano na niya nga siraduhan ang mga megasites sa syudad kag isaylo na lang ang Covid-19 vaccination sa mga district health centers kag sa mga barangay.
Mas mahapos ini para sa publiko suno sa alkalde bangud indi na magpila ang mga tawo sa dalagku nga vaccination centers para mag-avail sang bakuna.
