Ginalauman nga mangin mas madasig na ang hulag sang transaksyon sa Department of Foreign Affairs (DFA) Western Visayas matapos ang anunsyo ni Foreign Affairs Secretary Teodoro Locsin, Jr. nga indi na maghatag sang passport appointment slots ang ahensya sa mga recruitment agencies.
Sa baylo nga tigan-an sang slot, kinahanglan nga mag-online na ang mga recruiters sang overseas Filipino workers (OFWs) agud nga maka-secure sang appointment sa DFA.
Epektibo ini sa Marso 14, suno sa una nga abiso sang tiglikom.
Sa interview sang Bombo Radyo kay Iloilo City Mayor Jerry Treñas, iya ginpahayag nga kun mapatuman na ini nga bag-o nga pagsulundan, mangin mas maligwa na ang Regional Consular Office nga nahamtang sa isa ka mall sa Quezon St., Iloilo City.
Magluwas diri suno sa alkalde, may yara na sang kumpirmasyon halin may Sec. Vince Dizon, presidential adviser on Covid-19 response, nga aprubado na ang masunod nga alert level one nga status para sa syudad.
Mas manubo ini nga status kag mangin mas halog ang pagsulundan ipaanggid sa Level 2 status sang syudad subong.
Suno sa alkalde, ginalauman gid nga mas madamo na ang ma-cater sang DFA.
Una diri, may mga reklamo nga tuman ka dugay ang proseso sang application, renewal kag release sang passports sa DFA-Iloilo kag may mga reklamo man nga sa DFA website, wala sang available slot para sa appointment tubtob sa Agusto 2022.
