Magluwas sa nagapadayon nga pagsaka sa presyo sang gatong, madamo pa gid sa mga drivers ang nadulaan sang paglaum sa ila pagbyahe bangud man sa pila ka mga ordinansa nga magalimita sa ila hulag sa syudad sang Iloilo.
Ini matapos nga plano i-implementar sang syudad ang Perimeter Boundary Ordinance sa mga provincial jeepneys.
Ang Perimeter Boundary Ordinance ang nagadumili sa mga provincial jeepneys nga magsulod sa syudad sang Iloilo.
Kinahanglan na nila nga ibubo ang ila nga mga pasahero sa mga terminal.
Sa interview sang Bombo Radyo kay Mr. Raymundo Boyet Parcon, presidente sang Iloilo City Loop Alliance of Jeepney Owners and Drivers Association (ICLAJODA) kag chairperson sang Western Visayas Transport Cooperative, iya ginpahayag nga mahimo nga ila isaylo sa pila ka rota sa syudad ang ila mga myembro nga nagabyahe sa first town provincial jeepneys agud nga indi sila madulaan sang ila pangabuhian.
Suno kay Parcon, sa una nga ginpatawag nga consultative meeting nga ginpatigayon sang Iloilo City Council, wala nila nadiskusyunan ang amo sini nga sitwasyon sang mga provincial jeepneys nga indi na makasulod sa syudad sang Iloilo.
Sa amo nga meeting, naistoryahan lang suno kay Parcon ang Transport Route Plan sang Iloilo City kag indi man imbitado ang Probinsya.
Apang suno kay Parcon, tuyo man sang Iloilo City Government nga mabuhi na ang mga drivers sa syudad amo nga ginpasar ang amo nga ordinansa.
