Posible nga madugangan pa gid ang numero sang mga drivers sang Public Utility Jeepneys (PUJ) sa syudad nga magpahuway sa byahe bangud sa ginalauman nga pagsaka sa presyo sang gatong bwas nga adlaw.
Sa interview sang Bombo Radyo kay Mr. Raymundo Boyet Parcon, presidente sang Iloilo City Loop Alliance of Jeepney Owners and Drivers Association (ICLAJODA) kag chairperson sang Western Visayas Transport Cooperative, iya ginpasalig ang publiko nga wala sang transport strike nga matabo bangud ini ang ginadumili-an sa ila nga kooperatiba.
Suno kay Parcon, madamo na sa mga drivers ang nagareklamo bangud sa padayon nga pagsaka sa presyo sang produktong petrolyo.
Ginahulat naman sang mga drivers nga ila na mabaton ang fuel subsidy halin sa gobyerno.
Nahibaluan nga subong nga semana ginpasalig sa mga drivers kag operators nga ila na mabaton ang fuel subsidy nga P6,500.
Ini man ang dugang pa nga problema suno kay Parcon bangud wala nila nahibaluan ang guidelines kun paano nila mabaton ukon mapanagtag ang subsidy.
Indi athag sa transpprt groups suno kay Parcon kun isulod ini sa gihapon sa ila pasada card ukon ipundo ini sa mga accredited gasoline stations.
