Apisar 77 ka tuig na ang nakaligad sang natabo ang Liberation of Panay and Romblon, nagapabilin sa gihapon tubtub subong ang kaisog sang mga Ilonggo — kaangay man sang kaisog sang war veterans batok sa mga Hapon.
Ini ang ginbalikan ni Iloilo City Mayor Jerry Treñas kadungan sang ika-77 nga anibersaryo sang kahilwayan sang Panay gikan sa pwersa sang mga Hapon nga nagsakop anay sa Pilipinas sang World War II.
Nagatatak ang Marso 18, 1945 nga petsa sang ginlunsar sang Panay Guerilla Forces ang final assault batok sa Japanese Imperial Armed Forces.
Ginpabugal man sang alkalde ang iya nga amay, si Atty. Efrain Treñas, nga isa ka war veteran kag prisoner of war.
Ang amay nga Treñas ang kabahin sang 27 ka World War II veterans sa Panay nga nakabaton sang United States (US) Congressional Gold Medal Award sang ginpatigayon ang ika-74 nga anibersaryo sang Liberation of Panay, Romblon and Guimaras.
Ginpahayag sang alkalde nga dapat maangkon man sang bag-o nga henerasyon sang mga Ilonggo ang kaisog nga dala sang mga world war veterans.
Sa subong nga tion suno sa alkalde, pwede nga magamit ini nga kaisog sa pagbato batok sa Covid-19. ##
