Indi na magpasaka sang kaso ang pamilya sang biktima sang pagpangbuno sa Iloilo Terminal Market ukon Super.
Base sa CCTV footage, makita nga gulpyada lang nagpalapit sa biktima ang suspek kag ginbuno ang liog sini, ang dughan kag sa iban pa nga parte sang iya lawas.
Ang biktima amo si Dingcong Rendon, 49, kag residente sang Barangay North Baluarte, Molo, Iloilo City.
Ang suspek amo si Erwin Denosas, 38, kag residente sang Barangay Rizal Pala-Pala Zone II, Iloilo City Proper.
Sa interview sang Bombo Radyo kay Pol. Maj. Shella Mae Sangrines, hepe sang Iloilo City Police Station 1, iya ginpahayag nga nag-settle na ang duha ka pamilya.
Nag-ayo ang pamilya sang biktima nga buligan na lang sila sa pagpabulong kag balayran sa ospital matapos nga nakaagum sang multiple stab wounds si Rendon.
Suno kay Sangrines, ang suspek mismo ang nagsungka sa mga pulis matapos nga ginkumbinsi sang iya himata.
